СӨҮЛИЙН ҮНДЭСНИЙ ИХ СУРГУУЛИЙН БҮНДАН ЭМНЭЛГИЙН УДИРДЛАГУУДТАЙ УУЛЗАВ.
Монгол Улсын Ерөнхий сайд Л.Оюун-Эрдэнэ 2023 оны 2 дугаар сар, 2024 оны 3 дугаар сард БНСУ-д хийсэн айлчлалаар тус улсын Ерөнхий сайд Хан Дог Сү-тэй албан ёсны хэлэлцээ хийж, эрүүл мэндийн салбарын 1000 эмч, мэргэжилтнийг БНСУ-д мэргэжил дээшлүүлэх богино, дунд хугацааны сургалтын хөтөлбөрт хамруулах талаар тохирсон.
Энэ хүрээнд Элчин сайд С.Сүхболд 2025 оны 2 дугаар сарын 19-ний өдөр Сөүлийн Үндэсний их сургуулийн Бүндан эмнэлгийн удирдлагуудтай уулзаж, Эрүүл мэндийн шинжилгээний төв, Хавдарын төв, Тархи, Зүрх судасны төв, Олон улсын эмчилгээний төвийн үйл ажиллагаатай танилцав.
Бүндан эмнэлгийн удирдлагууд тус эмнэлгийг зорин үйлчлүүлж буй Монгол иргэдийн тоо сүүлийн 2 жилд тасралтгүй нэмэгдэж буйг дурдаад тэдэнд зориулан 15 хувийн хөнгөлөлттэй үнээр эрүүл мэндийн үйлчилгээ үзүүлж, чих, хамар, хоолойн эмч нарыг мэргэжил дээшлүүлэх сургалтад хамруулсан тухайгаа мэдээлэв.
Уулзалтаар талууд Монголын эмч, мэргэжилтнүүдийг үргэлжлүүлэн сургалтад хамруулах, урьдчилан сэргийлэх гарын авлага боловсруулах, эрүүл мэндийн үзлэг, оношилгооны хамтарсан хөтөлбөр хэрэгжүүлэхэд үргэлжлүүлэн хамтран ажиллахаар тохиров.