АЛСЛАГДСАН БҮС НУТАГТ АМЬДАРЧ БУЙ МОНГОЛ ИРГЭДЭД КОНСУЛЫН ҮЙЛЧИЛГЭЭГ ХҮРГЭХЭЭР АЖИЛЛАЛАА.
Энэ 2 дугаар сарын 15-ны өдөр Монгол Улсаас БНСУ-д суугаа ЭСЯ-ны Консулын хэлтэс, Пусан хотод суугаа Консулын газар хамтран Өмнөд Чолла мужийн Гуанжу хотын Өргөмжит консулын дэмжлэгтэйгээр алслагдмал бүс нутагт ажиллаж, амьдарч байгаа монгол иргэддээ консулын үйлчилгээ үзүүллээ.
Арга хэмжээний үеэр Элчин сайд С.Сүхболд тус бүс нутагт оршин суугаа монгол иргэдтэй уулзаж, сонирхсон асуултад хариулж, ярилцлаа.
Тухайлбал, Элчин сайд С.Сүхболд “… монгол хүүхдүүдэд зориулан сургууль нэмж байгуулах боломж, эрүүл мэндийн 1,000 эмч, мэргэжилтэн бэлтгэх, хэлний курст суралцаж буй оюутнуудад чиглэсэн тэтгэлэгт хөтөлбөр хэрэгжүүлэх, хөдөлмөрийн гэрээт ажилтны гэрээний хэрэгжилт болон эмчилгээний шугамаар ирж буй иргэдийн асуудлаар …”хийж буй ажлаа танилцуулав.
Иргэдийн зүгээс Пусан хотноо Монгол сургууль нэмж байгуулах, сургуулийн насны хүүхдүүдийн боловсролд анхаарч, цахимаар суралцуулах, эмчилгээний зорилгоор ирж буй иргэдийг визийн шаардлагаас чөлөөлөх, хөдөлмөрийн гэрээт ажилчдын гэр бүлд хөнгөлөлттэй нөхцөлөөр виз олгох, ажил олгогчоос цалинг олгохгүй байдал, суугаа орны эрүүл мэндийн даатгалд хамрагдах боломжийг эрэлхийлэх, иргэд, хүүхдийн сэтгэл зүйд онцгой анхаарч, арга хэмжээг авахыг хүсэв.
Мөн БНСУ-д 57,000 гаруй монгол иргэд оршин сууж байгаа энэ үед ЭСЯ-ны орон тоог дорвитой нэмэж, Консулын хэлтсийг бэхжүүлэх шаардлагатайг дурдаж байв.
Тус арга хэмжээнд Хөдөлмөр, нийгмийн хамгааллын үйлчилгээний төв, Төрийн банк, Хаан банк, БНСУ-ын “Гуанжу банк”, “Тэргүүн өндөр”, “Ти Эс энд Эс” болон “Мүнму” хуулийн фирм, өмгөөллийн “ЭВ ЭЕ Партнерс”, “AZ” санхүүгийн байгууллага, даатгалын газар, “Дурумоа” олон соёлт гэр бүлийн төв зэрэг 10 гаруй байгууллага хамтран оролцож, давхардсан тоогоор 359 иргэнд тус тусын үйлчилгээ үзүүлж, шаардлагатай мэдээлэл, зөвлөгөө өгөв.
