СӨҮЛИЙН ҮНДЭСНИЙ ИХ СУРГУУЛИЙН ЭМНЭЛГИЙН ЗАХИРАЛТАЙ УУЛЗАВ.
️Монгол Улсын Ерөнхий сайд Л.Оюун-Эрдэнэ 2024 оны 3 дугаар сард БНСУ-ын Ерөнхий сайд Хан Дог Сү-тэй хийсэн албан ёсны хэлэлцээний хүрээнд Солонгосын эмийн стандартыг Монгол Улсад нутагшуулах, эм импортлох, эрүүл мэндийн 1000 эмч, мэргэжилтэнг Солонгос улсад бэлтгэх ажлыг хэрэгжүүлэхээр зохих уулзалтыг хийж байна.
Энэ хүрээнд Элчин сайд С.Сүхболд 2025 оны 02 дугаар сарын 13-ны өдөр Сөүлийн Үндэсний Их Сургуулийн Эмнэлгийн захирал Ким Ён Тэ-тэй уулзав.
️Уулзалтын эхэнд Элчин сайд С.Сүхболд 130 жилийн түүхэнтэй тус сургуулийн Эмнэлгийг зориж буй монгол иргэдэд эрүүл мэндийн үйлчилгээг хөнгөлөлттэй нөхцлөөр үзүүлэх, Солонгос улсад амьдарч буй монгол иргэдийг эрүүл мэндийн урьдчилсан үзлэг, шинжилгээнд хамруулах, Монгол Улсын эрүүл мэндийн 1000 эмч, мэргэжилтэн бэлтгэхэд дэмжлэг үзүүлэхийг хүсэв.
Сөүлийн Үндэсний Их Сургуулийн Эмнэлэгийн захирал Ким Ён Тэ Монголын Улсын клиникийн нэгдүгээр төв эмнэлэг, Хавдар судлалын үндэсний төв, Гэмтэл согог судлалын үндэсний төв болон АШУҮИС-тэй олон жил амжилттай хамтарч ажиллаж ирснийг онцолж, эмнэлгийг зорин ирж буй гадаад үйлчлүүлэгчдийн 25 хувь нь монгол иргэд байгааг тэмдэглээд эмнэлгийн үйл ажиллагааны талаар товч танилцуулав.
Талууд цаашид Монголын анагаах ухааны салбарын эмч, мэргэжилтнүүдийг үе шаттайгаар мэргэжил дээшлүүлэх, дадлагжуулах, Арабын Нэгдсэн Эмират Улстай хэрэгжүүлж буй тус эмнэлэгийн эрүүл мэндийн хамтын ажиллагааны шинэ механизмыг Улаанбаатар хотноо шинээр байгуулах Хавдрын эмнэлгийн төсөлд хэрэгжүүлэх, дэд бүтэц, хүний нөөцийг бүрдүүлэхэд хамтран ажиллахаар тохиролцов.
Уулзалтын дараа С.Сүхболд Сөүлийн Үндэсний Их сургуулийн төв эмнэлэг, Хавдрын эмнэлэг, Хүүхдийн эмнэлэг, Олон улсын эмчилгээний төвийн үйл ажиллагаатай биечлэн танилцав.