АЛБАН ЁСООР УГТАХ ТӨРИЙН ЁСЛОЛ ЭХЭЛЛЭЭ

Албан ёсоор угтах төрийн ёслол эхэллээ

Монгол Улсын Ерөнхийлөгч Ухнаагийн Хүрэлсүх, гэргий Лувсандоржийн Болорцэцэгийн хамт Бүгд Найрамдах Солонгос Улсын Ерөнхийлөгч И Жэ Мён, гэргий Ким Хе Гён нарыг Д.Сүхбаатарын талбайд албан ёсоор угтан авлаа.

Угтах ёслол Төрийн хүндэт харуулын захирагч айлтгал өргөснөөр эхэлж, хоёр улсын Төрийн дуулал эгшиглэв. Үүний дараа хоёр улсын Ерөнхийлөгчид Төрийн ёслолын цэргийн цагаан туганд мэхийн ёсолж, Ерөнхийлөгч И Жэ Мён Төрийн хүндэт харуулын цэргүүдтэй мэндчиллээ.

Монгол Улсын Ерөнхийлөгч У. Хүрэлсүх, Бүгд Найрамдах Солонгос Улсын Ерөнхийлөгч И Жэ Мён нар угтах ёслолд хүрэлцэн ирсэн албаны төлөөлөгчид, Монгол Улсад суугаа Дипломат төлөөлөгчийн газруудын тэргүүн, олон улсын байгууллагын суурин төлөөлөгчидтэй мэндчилэв.

Төрийн тэргүүн нар Их эзэн Чингис хааны хөшөөнд хүндэтгэл үзүүлсний дараа Ерөнхийлөгч И Жэ Мён Төрийн ордны Хүндэт зочны дэвтэрт гарын үсэг зурлаа.